Ecc 3 | ZomZIV | STEP | Na khempeuh in hun nei ciat hi, van kikhupsin nuai-a piang khempeuh amau hunhun-a piang hi-a:

Ecclesiastes 3

Na Khempeuh in Hun Neiciat

1 Na khempeuh in hun nei ciat hi, ^a
van kikhupsin nuai-a piang khempeuh amau hunhun-a piang hi-a:
2 suah hun omin sih hun om a,
suan hun omin bawhkhiat hun om a, ^b
3 thah hun omin damsak hun om a, ^c
phelkhiat hun omin lam hun om a,
4 kah hun omin nuih hun om a,
thum hun omin lam hun om a,
5 suangte thehthang hun omin tuate khop kik hun om a,
kikawi hun omin kikhah hun om a,
6 zon hun omin mansak hun om a,
kep hun omin paihmang hun om a,
7 balkek hun omin phop hun om a,
daih hun omin pau hun om a,
8 it hun omin muhdah hun om a,
kido hun omin kilem hun om hi.

9 Na sempa in gimpi-a na a sepna panin bang lawhtak ahi hiam? 10 Pasian in mihing tungah a suat vangik ka mu ta hi. 11 Amah in na khempeuh amau hun ciat-a a melhoih dingin a bawl ahi hi. Amah in mihingte lungsim a tawntunga ding zong guan napi amaute in Pasian nasepsa a kipatna pan a mong dong a lamteh thei tuan kei uh hi. 12 Mihingte adingin a nuntak sungun na hoih sema a lungdam ding uh sanga hoihzaw bangmah ka thei kei hi. 13 Mihing peuhmah in ne thei dawn thei-a a nasepna khempeuh ah a kham a ngahna - hih in Pasian letsong ahi hi. 14 Pasian sepsa khempeuh a kip tawntung ding ahilam ka thei a; bangmah kibehlap thei loin bangmah a kilakhia thei kei hi. Mihing in amah a zahtak theih nadingin Pasian in tuaci-in a bawl ahi hi. ^d

15 A omte a om ngei khinsa hi-a, ^e
a om lai dingte zong a om ngeisa mah hi-in, ^f
Pasian in a om khinsa mah mangkik ^{▼▼3.15 Ahikeh Pasian in a beisa sam kik} ding hi.

16 Tuateh sunni nuai-ah nadang ka mu lai hi:

Thukhenna munah - gitlohna om a,
thutang omna munah - gitlohna a om hi.

17 Ka lungsim sungah,

“Pasian in thumaante le migilote tungah
thu a khen tuak ding hi, ^h
ahang in sepna ding hun omin
bawl nading hun om ding hi,” ci-in ka ngaihsun hi.

18 Kei zong, “Mihing in, amaute ganhing tawh kibang ahilam a muh theih nadingun Pasian in amaute sittel hi. 19 Mihingte tuah le ganhingte tuah a kibang hi-in, a nih un a kibang tuah ding ngak uh a: Khat a sih bangin a khat zong a si hi. A vekpi in huu sang ^{▼▼3.19 Ahikeh kha} ciat uh a; ganhing sangin mihing a tungnun zawkna a om kei hi. Na peuhmah a mawknapi ahi hi. 20 A vekpi-in a mun kibangah pai uh hi; a vekin leivui pan pianga, tuateh leivui mah ah ciah kik hi. 21 Mihingte kha a kahtoh lam le ganhingte ^{▼▼3.21 Ahikeh kua in mihing kha a tunglamah a kahtoh lam thei a, ganhingte kah lei sungah a tuahsuk lam thei ahi hiam?} kha lei sungah a tuahsuk lam kua in thei ahi hiam?” ci-in ka ngaihsun hi. ^k

22 Tua ahi ciangin mi khat in ama nasep nuam a sak ding sanga hoih zaw bangmah ka mu kei hi; bang hang hiam cih leh tua in ama tanh ahi hi. Ahang in, ama nungah bang piang ding cih a en dingin amah kua in theisak thei ding ahi hiam?